Vinir í velgengni

Lumar þú á auðlind?

Verkefni okkar í daglegu lífi eru fjölmörg. Allt frá einföldum hlutum eins og að versla í matinn til erfiðari ákvarðanna eins og að sækja um vinnu eða gera samninga við lánadrottna. Öll viljum við gera betur en vitum oft ekki hvaða leiðir á að velja og hvernig ætti að velja þær. Sumir eiga jafnvel erfitt með að sjá hvar þeir eru standa í dag.

Síðastliðin ár hef ég fengið fjölmörg verkefni í lífinu. Lengi tókst ekki vel til og oft valdi ég rangar leiðir og aðferðir til að uppfylla drauma mína. Margoft gekk ég á veggi og barðist gegn straumnum. Stundum sat ég í súpunni og stundum gafst ég einfaldlega upp. En oft valdi ég vel og náði árangri. Sem dæmi hætti ég neyslu áfengis, hætti að reykja, lagði til hliðar fordóma, ótta og hroðvirkni og lærði góð og eðlileg samskipti. Fjármál mín hafa færst frá glundroða og ráðleysi til jafnvægis, samskipti við fjölskyldu hafa batnað stórlega og ég hef eignast marga kæra vini. Ég sagði einnig skilið við “starfsframakapphlaupið” svokallaða og fór í langþráð en óttablandið háskólanám. En eitt það skemmtilegasta sem ég hef gert er að taka saman bestu aðferðirnar og bestu mistökin af reynslu minni og setja saman í áhrifaríkt námskeið fyrir alla sem langar að breyta lífi sínu og öðlast betri líðan.

Í lífinu bíða þín ekki vandamál heldur lausnir. Það er einmitt slagorð Vinir í Velgengni sem er eitt skemmtilegasta og öflugasta nýsköpunarverkefni ársins, nýsköpun í þínu eigin lífi og tilveru.

Hlutverk verkefnisins er að staðsetja og skilgreina auðlindir þínar, setja raunhæf markmið og ná velgengni með þessar auðlindir.

Allir eiga innra með sér auðlindir sem geta skapað okkur ríkidæmi en suma vantar jafnvel bara smá hjálp við að þekkja og nýta þær. Hvort sem þú óskar þér aukinnar menntunnar, þróa áhugamál, nýta betur reynslu eða bara velta upp heimspekilegum hugmyndum um lífið þá ert þú þín eigin auðlind. 

 

Allir sem óska betri líðan og vilja taka þátt í skemmtilegasta og öflugasta nýsköpunarverkefni ársins er boðið á kynningarfund í Virkjun næstkomandi miðvikudag 9.febrúar kl 14.00.

 

Með kærri kveðju,

Haukur Hilmarsson

Sjálfboðaliði í Virkjun og Háskólanemi